SARATOK: Rayat kelebih agi peranak rumah panjai diperansang ngaul diri nanam rian Musang King.

Sapit Menteri Pengeluar Kuasa enggau Pengeraja Asal, Ali Biju madah, rian Musang King tau diuji laban kitai nemu bisi pengulih besai enggau nerima peminta tinggi ba makit menua tu enggau eksport.

“Baka nanam rian Musang King tu, ba menua kitai utai tu agi baru tang ba Semenanjung din udah lama lalu udah mansutka mayuh asil ti nyata dipeda.

“Ku orang, rian tu tusah diintu, endang amat, tang enti diintu enggau manah, iya deka mansutka asil chukup manah.

“Ambika chunto, bisi kompeni ari menua China deka meli rian Musang King ba bala pekebun di Pahang enggau rega RM30 sekilo, ditimbang enggau umbang sekali enti diangkat.

“Reti iya, enti ba kitai ditu tau endar rega nya, enti bisi orang meli RM30 sekilo tang din sida rindu agi nyual kediri enggau rega RM40 sekilo ari diangkat orang tengah.

“Dia kitai ulih meda pengulih makit rian Musang King tu chukup besai lalu enti bisi peluang diberi, anang enggai bala kita ngerebut peluang nya,” ku iya seraya madahka projek nanam rian udah dipun iya empu lebih setaun ke udah.

Ali mansutka jaku nya lebuh bejaku ba mua mayuh rambau Program Randau Pemesai Begulai Enggau Rayat ba Rumah Tama Ancharang, Nanga Melupa ditu, pagi tadi.

Berebak enggau nya, Ali udah ngemendarka agih belanja di baruh Projek Mit Pemansang Menua Pesisir (MRP) penyampau RM15,000 ngagai Komiti Pemansang enggau Pengelikun Genturung Pendiau (JKKK) Rumah Tama seraya Biro Indu nerima RM6,000

Berita penuh Ruai 6 pagila.