SIMANGGANG: Berita penusah karam di darat nuntung Rumah Panjai Nanga Rasau, Engkilili ditu ngasuh mayuh kitai berasai sinu lebuh betatika nasip sida serumah.

Baka selama, raban ari Serakup Dayak Sarawak (Pedas) begulai enggau Dayak Bukit Kelingkang (DBK) berumban mupu duit bantu dikena nulung sida ke tasah angus.

Ketuai Pampang Pedas Sri Aman, Jackson Bara ti ngetuaika raban nya, dulu baumka atur pejalai pupu, bebelika barang bantu enggau jam nganjung bantu kin.

“Pengudah nerima berita penusah tu, kami lalu betesau ngaga pupu ngagai bala menyadi dalam Pedas enggau DBK selampur nengeri nitihka sempekat dalam serakup.

“Tembu bepupu, kami lalu ngelangkar pejalai meli barang enggau ngerintai dulu bantu ke patut diberi berundingka utai diguna sida serumah jam diatu.

“Penemu digempung ke alai bala kami setuju nganjung dulu bantu gari, barang pemakai baka mi, ruti, kupi enggau ai irup, kereban kena mandi enggau meresi diri sereta bantu mata duit,” terang Jackson Bara lebuh dirandau Suara Sarawak seharitu.

Iya madah, sida betubuh 20 iku ngena enam buah entukar meleka ari pasar Simanggang urung pukul 4 lemai napatka rumah panjai ke udah angus kena lemai 16 September tu tadi.

Penatai sida sebuat disambut dua iku tuai rumah enggau staf ari Opis Pengintu Pengelantang Pendiau Mensia Mayuh (JKM) ke mega bisi datai kia lebuh nya.

“Sida ke angus tu bisi 18 pintu bilik ke alai Tuai Rumah Naga ngetuaika lapan pintu bilik seraya 10 pintu ke bukai betuaika Tuai Rumah Jackson Atit.

“Seduai bela datai ngelalu penatai bala kami enggau terutu ai mata enggau sebana laban ati agi kelalu sinu ngenang penusah ngenyit ke nuntung,” ku Jackson Bara enggau ati kasih.

Berita penuh Ruai 8 pagila.