KAPIT: Sebuah sekula enggau tiga buah rumah panjai ba Dun Baleh udah nerima bantu tasah bah.

Agih belanja penyampau RM212,000 tu udah disua ngagai sebuah sekula enggau peranak ba tiga buah rumah panjai ti tasah bah.

Sapit Kepala Menteri Sarawak, Tan Sri Datuk Amar Dr. James Jemut Masing enggau Kaban Parlimen Hulu Rajang, Datuk Wilson Ugak Kumbong bela nyuaka agih belanja RM38,500 ngagai tiga buah rumah panjai ti napi penusah bah nya.

Pemeri nya udah disuaka Ugak empu lebuh ngabas kandang menua ti napi penusah bah ba Parlimen Hulu Rajang kena 15 September tu tadi.

Ba pejalai ngabas nya, Ugak udah nyuaka pemeri tu ngagai RM29,000 ngagai Rumah John Katil, Karangan Ara Baleh (29 pintu), RM13,000 ngagai Rumah Lembang, Nanga Sedugau, Sungai Gaat (13 pintu) enggau Rumah Panyau, Nanga Kemali (35 pintu) penyampau RM35,000.

Nambahka nya, Ugak mega madahka iya udah nyuaka agih belanja RM50,000 di baruh Projek Nyeleti Rumah Miskin Sarawak (PPRMS) ngagai Rumah John Katil enggau Rumah Panyau dikena nyeleti rumah ti balat rusak enggau patut diseleti jampat.