KUCHING: Sapit Menteri Pemansang, Orang Indu, Ruang Bilik enggau Komuniti (KPWKM), Datuk Siti Zailah Mohd Yusof meri agih belanja penyampau RM6. 3 juta ungkup 55 buah Palan Pemulai Pemanah Pendiau Komuniti (PDK) di Sarawak.

Penyampau 2,250 pematih deka bulih pemaik ari agih belanja nya, ku Siti.

Agih belanja tu deka dikena ngemuntang Opis Pengintu Pengelantang Komuniti (JKM) ngatur pemansang ungkup raban nyelai pendiau (OKU) di PDK.

“Nya alai, aku ngelalau bala ketuai komuniti enggau ketuai raban bansa awakka semampai bejalai ka pengawa mansik isu enggau perengkaguna deka dikena bala OKU di menua tu,” ku iya.

Siti madah munyi nya rambau Program Ngabas KPWKM Renggat Nengeri Sarawak di PDK Sentuhan Kasih Kuching, kemari.

Pia mega, Siti madah perintah besai udah meri bantu khas RM300 nengah Penjana ungkup 190,000 OKU ba kategori Penerima Bantu Elaun Kereja Orang Nyelai Pendiau (EPC), Bantu Orang Nyelai Pendiau Enda Ulih Bekereja (BTB) enggau Bantu Nyaga OKU Sakit Raya (BPT).

Siti Zailah madah, penyampau OKU ngerijister ba JKM ba bulan Julai 2020 penyampau 567,435 iku di selampur menua lalu di Sarawak penyampau 37,673 OKU ti udah dirijister

“Kami nemu bantu RM300 enda mayuh tang nya ulih ngelempung tating belanja ditanggung apai indai sida.

“Nya alai perintah nubuhka Insentif Penjana Kerjaya (Hire Malaysia) iya nya ngambi pengereja ari raban OKU enggau penyereta Program Kembali Bekerja Perkeso,”ku iya enggau silik.

Nangkan nya, penyampau RM1000 diberi perintah ngagai pengaji enti ngambi pengereja ari raban OKU nyengkaum nitihka syarat peminta ti udah dikenuku.

PDK nyadika tating nyediaka pematih ti ulih meri pemansang sebedau sida (OKU) nyereta diri ba pelajar enggau pengereja.

“Aku ngelalau apai indai, Ketuai komuniti enggau Ketuai Kaum patut ngerijister bala anak sida ti OKU awakka sida bulih pemaik ari sukut bantu ti diberi perintah ngagai OKU ti udah rigister,”ku iya.

Sama datai Menteri Pengintu Pengelantang Pendiau, Komuniti, Indu, Ruang bilik enggau Pemansang Anak Mit, Datuk Seri Fatimah Abdullah, Ketuai Direktor Pengelantang Pendiau Komuniti, Zulkifli Ismail enggau Ketuai Direktor Sitak enggau Pemansang Ruang Bilik Menua, Abdul Shukur Abdullah.