SARATOK: Peranak menua pesisir kelebih agi sida ke diau ba rumah panjai diperansang ngemeranka betanam chara moden bekenaka teknologi baru baka fertigasyen.

Sapit Menteri Pengeluar Kuasa enggau Pengeraja Asal, Ali Biju madah, pengawa betanam muntang agi dikereja lalu ulih mansutka asil belipat enggau bisi kualiti tinggi.

Ku iya, taja betanam chara moden begunaka puku besai tang asil dikeluar endang setipak enggau penyampau puku dikena, luba mega nyampau agi ari puku nya diterima kitai.

“Enda baka suba, diatu nyau deka semua pengawa bekenaka teknologi baru berengkah ari kitai nanam, ngesum, ngintu nyentuk ngetau asil utai tanam.

“Kitai bechuntoka pengawa raban indu ba rumah panjai tu ti udah ngepunka projek lia fertigasyen patut dipuji laban sida berani nguji betanam ngena chara tu.

PROJEK PEMUNGKAL… Ali disempulang Lamunai, Tedung, Tuai Rumah Tama enggau bala ke bukai begambar ba mua sekeda ari 5,000 paung lia fertigasyen.

“Tu mih betanam chara baru ti patut ditunda enggau direbut rebak baru enti sema bisi ati deka maju ba pengawa tu,” ku iya.

Ali mansutka jaku nya lebuh bejadika Projek Lia Fertigasyen Biro Indu Rumah Tama Ancharang, Nanga Melupa ditu nyerumba Program Berandau enggau Rayat, pagi kemari.

Iya madah, Sitak Pemansang Betanam Betupi Begulai (IADA) Kalaka, Saribas enggau Betong nyadi ejensi meri sanding penemu enggau nyendiaka bantu betanam betupi.

Ali madah, pemujur projek nanam 5,000 pun paung lia ngena chara fertigasyen nya kebendar dikena iya ngerandang jalai ngagai projek ke besai agi jemah.

Ungkup penerang, Projek Lia Fertigasyen tu diberi IADA nengah saup belanja ngulu kus betanam penyampau RM2, 500 ari Ali empu, ungkup 25 iku penyereta.

PERATI MANAH… Ali ngemataka Tedung benung nunjukka chara ngintu lia ngagai Lamunai (kanan) enggau bala bukai.