KUCHING: Dewan Bandaraya Kuching Utara (DBKU) nyukung penuh atur pengawa World Clean Up Day 2020 diatur ninting hari enam, minggu ketiga ba bulan September di selampur dunya.

Program tu diatur begulai piak DBKU enggau Junior Chamber International (JCI).

Datuk Bandar Kuching, Datuk Junaidi Reduan madah, tu program ti manah laban ulih nyaga pemeresi mengeri Kuching enggau endur bukai.

“Program tu diatur ba selampur dunya ungkup nyaga pemeresi kandang mengeri kelebih agi di indu nengeri Kuching.

“Kitai ukai aja nyaga pemeresi kandang mengeri, tang pengawa tu mega meri pemaik ngagai pengerai mensia mayuh,” ku iya.

Junaidi madah munyi nya lebuh ditanya bala pemberita ba rambau Program World Clean Up Day 2020 di Square Tower, Tebingan Kuching, pagi tadi.

Iya madah, nengah program tu mensia mayuh deka sedarka tanggungpengawa nyaga pemeresi ba kandang endur sida diau.