SIMANGGANG: Rayat Malaysia deka berasai puang pengudah nerima berita pemidang Bujang Berani Datuk (Sarjan) Awang Raweng.

Kitai tentu berasai tegepang lebuh ninga berita sinu sempama lenyau ‘tekang gemala’ ti nadai ganti lebuh kitai agi ngasaika semangat ngintu Hari Malaysia Ke-57.

Siku dalam seribu lalu iya aja anak Malaysia ti kala nerimai anugerah midul George Cross ari Perintah British kelai pemerani iya maya ngelaban komunis.

Awang ditukuka sulai urung pukul 2 lemai kemari ba rumah iya di Simanggang.

Sebedau tu, Pemberita Suara Sarawak bisi nusui cherita pemerani iya nengah randau eksklusif kena 17 Julai tu tadi.
Kena 22 Julai tu tadi beserimbai enggau Hari Sarawak, Suara Sarawak bisi bekunsika cherita Awang Raweng dikumbai ‘Diserang hendap 50 komunis’.

MERUAN DIKENANG… Empati begambar kenang enggau Awang rambau pejalai ngabas iya di Simanggang, apin lama ke udah.

Tiga hari tu tadi beserimbai enggau Hari Malaysia, New Sarawak Tribune mega bisi bekunsika cherita ti sama dikumbai ‘Remembering George Cross recipient’s sacrifices’.

Pemberita berasai chukup betuah laban ulih berandau enggau mendingka cherita pemerani iya maya umur nyau majak tuai.

Seharitu, pemberita ngasaika jaku Ketuai Gerempung Veteran Soldadu Kor Renjer (PVTKR) Sri Aman Sarjan (B) Empati Untol nya betul lebuh iya nguluka aku betemu enggau Awang.

Ku Empati, iya suah mesan ngambika semua berita ti dikeluar tu disimpan nyadika kenang dudi hari.

“Lalu iya ngasuh aku ngerakam semua cherita ti ditusui Awang seraya madahka semua cherita tu manah amat disimpan ngambika bisi dikenang lebuh iya udah midang ila,” ku iya.

NADAI GANTI… Gambar Awang maya agi biak kelia.

Udah tu kitai semina ulih mendingka cherita ti ditusui orang bukai lalu nadai agi mendingka cherita ditusui bujang berani tu empu.

Lebuh betemu enggau bujang berani tu, pendiau iya sigi nyau enda regas enggau nadai dapat sereta jaku dipansut iya nyau rapas didinga.

Nambahka, Awang suba semina ulih makai asi bubur aja dikena ngeringka tulang aja kenyau ari empat taun ke udah ketegal ditepan penyakit lempuang belaie.

Tang aku berasai temegah meda iya lebuh diasuh begambar ngena baju kot ti bisi dilekat enggau midul pemerani ke kala diterima iya.

Iya gagit enggau besemangat amat lebuh diasuh duduk maya ngambat penatai aku.

Taja enda kering megai senyata tang pemerani enggau jasa iya nyadi soldadu seruran dikenang kitai belama.

Ungkup penemu, Awang sulai ninggalka kitai maya umur iya manggai 104 taun.