KUCHING: Perintah Sarawak mayar pampas tanah ngagai peranak nitihka rega ke patut, pia ku Kepala Menteri Datuk Patinggi Abang Johari Tun Openg.

Ku iya, Perintah deka mayar pampas nya nitihka rega ke patut lebuh tanah sida kena teresa ungkup projek pemansang.

“Nya alai, terima kasih ngagai rayat laban udah meri kerejasama ungkup projek pemansang ngaul genturung pendiau.

“Meri pengaga ati ngagai bala penerima ti udah bulih chek pampas lalu kami berasai lantang ati laban ulih ngatur menua tu enggau manah,” ku iya.

Abang Johari mansutka jaku nya ba Pengawa Nyuaka Chek Pampas Tanah ungkup projek nangkir Kampung Segedup ba sebuah hotel tebilang, ditu kemari.

Ku Abang Johari ti mega Adun Satok, kemari (Hari Empat tu tadi), Sarawak udah nempa sejarah baru pengudah nerima bayar SST 2019 ari Petronas penyampau manggai RM3 bilion.

“Seagi aku enggau Fadillah (Kaban Parlimen Petra Jaya Datuk Seri Fadillah Yusof) nyadi pengari rayat ba sitak kita (penerima pampas ari Kampung Segedup), kitai deka ngasaika ubah enggau perengkaguna ba sitak Kuching tu.

“Kami naka ulih ngiga chara pemadu manah ngemansangka Sarawak ngambi nyadi nengeri pemadu maju dalam Malaysia manggai taun 2030,” ku iya madah nyemetak.

Dulu ari nya, Penguasa Tanah enggau Survey Bagi Menua Kuching Alfian Bawi madah, bisi 152 projek ngempu baru tanah di Kuching ba timpuh tiga taun kenyau ari 2017.

“Pengawa ngempu baru tanah tu mungkur 650 lot enggau bayar pampas penyampau RM283 juta.

“Ba taun 2020, bisi 57 projek ngempu baru tanah dipejalai ke alai 22 ari nya udah tembu enggau pampas penyampau RM30.4 juta nyengkaum projek nangkir Kampung Segedup,” tandu iya.

Nambahka nya ku Abang Johari, pengempu tanah Kampung Segedup tepantup ati enggau pampas diberi sereta nyukung penuh projek pemansang ba kandang menua sida.

“Tu ngayanka JTS nyukat tanah ungkup projek ngempu baru tanah setipak enggau rega makit diatu.

“Nya kebuah, kerejasama ari peranak Kampung Segedup mesti nyadi chunto ngagai peranak ba genturung pendiau bukai,” terang iya.

Sama datai Fadillah enggau Sapit Ketuai PBB Pampang Satok Datuk Ibrahim Baki.