ENGKILILI: Menteri Muda Pengelantang Komuniti, Datuk Francis Harden Hollis nyuaka bantu penyampau RM8,000 ngagai tudah sida ke tasah angus di rumah panjai Rasau, Engkelili.

Harden madah, bantu tu disua ngagai Tr Naga enggau Tr Atit ngarika 18 pintu sida serumah ke kena penusah angus.

“Ngenataika penyinu ati ngagai semua kita ke dituntung penusah tu, nya alai bantu ari aku tu dikena ngelempungka tating penusah ke ditapi kita.

“Terima kasih ngagai bala bukai ke udah besaup meri bantu ngagai peranak rumah panjai Nanga Rasau ditu,” ku iya.

Harden ke mega Adun Simanggang mai bantu barang guna ninting hari enggau pemeri belanja.

Kenu ku iya, perintah dibaruh Gempung Parti Sarawak (GPS) semampai siru sereta beratika penusah ti ditapi bala rayat menua tu.

“Sarawak tu chukup nyelai laban semua bansa di menua tu besaup mantu bala ti kena penusah baka di rumah panjai tu.

“Pengawa tu manah laban ulih negapka kaul enggau pangan diri di menua tu,” ku penerang iya.

Sida ti bisi meri bantu tu kaban SUPP Simanggang, Tay Motor Aaron Tay, Toyota Sri Aman Jeff Yew, O’neal Sii Poh Hing, Masjaya Simon Khoo, Devid Lee, Big Food Kopitiam Ngu Sze Lee, Bayu Food Court Calvin Chong.

Kelimpahnya, Lung Motor Tan Ting Lung, Matthew Teng, Uptimise Enterprise Ben Lai, Chop Chip Soon Sam Lai, VJ Auto Detailing Vivi Tan, Lian Da Tony Wong Ha Hieng, Golden Cafe Golden Ngu enggau Mee Sedap tauka Y.C Car Galvin Chin.