KUCHING: Bisi 25 iku raban nembiak ke nyereta Program Jelajah Belia P207 Igan sangkai enda lama ba Palan Servis Parti Pesaka Bumiputera Bersatu (PBB) Pampang Dun Satok ditu kemari.

Sapit Ketuai PBB Dun Satok Datuk Ibrahim Baki ti nerima penemuai enda lama sida nya madahka pengawa nya chukup manah dikena raban orang nembiak belajar sereta ngulihka penemu.

“Seraya betemu, raban biak ulih belajar sereta besilih buah runding ungkup program ti deka digaga sepemanjai taun.

“Tu siti chara kami di PBB nyeridi raban orang biak begempung ba dalam parti,” ku iya bejaku ba Palan Servis PBB Pampang Dun Satok ditu, kemari.

Kenu ku Ibrahim, taja raban nembiak Jelajah Belia P207 Igan nya ngetu enda lama tang sida agi ulih bekaul enggau pangan diri lebuh udah pulai ngagai palan diri empu.

“Ari pengawa ti baka tu kitai deka bulih bakih enda ngira kini tungga pejalai.

“Tu ulih mantu ketuai raban bansa negapka penuduk sida dalam parti laban sukung manah ari raban orang biak,” ku iya.

Kelimpah ari nya, Ketuai Raban Jelajah Belia P207 Igan Wan Viyarahman Wan Zullkiplee madahka pengawa sida mai mutusikal bepun di Kampung Sekaan lalu dilepaska Kaban Parlimen Igan Ahmad Johnie di Sibu kena 16 September beserimbai enggau Hari Malaysia.

“Seharitu (kemari) kami deka bekejang Sematan sebedau ngapuska pejalai di Teluk Melano.

“Datai di Teluk Melano kami deka ngentakka menira nandaka program jelajah kami udah abis,” ku iya.

Wan Viyarahman madah penemuai sida ngagai Palan Servis PBB Dun Satok amat besai reti dikena nyikap runding bala orang biak napi pekara ti deka nuntung dudi hari.

“Igan siti kubu kuat Gempung Parti Sarawak (GPS) lalu kami raban biak ba pelilih nya deka bebendar ngetanka kubu kami tu.

“Kelimpah besilih penemu, penemuai tu ulih ngerapitka kaul semua raban biak dalam parti,” ku iya.

Sama bisi datai Ketuai Raban Biak PBB Dun Satok Kaunsilor Dzamaluddin Zainudin enggau ke bukai.