KUCHING: Opis Pengintu Pengelantang Komuniti Sarawak (JKMS) bisi tiga pengawa puang nyadi Pemesai Pemulai Pemanah Pendiau Lutur Bejaku U41 enggau Lutur Pematih Fisioterapi U29 ba Pusat Pemulihan Dalam Komuniti (PDK).

Menteri Pengintu Pengelantang Pendiau, Orang Indu, Ruang Bilik enggau Pemansang Anak Mit, Datuk Seri Fatimah Abdullah madah, ungkup taun 2020 aja JKMS udah ngambi penyampau 12 iku Pematih tauka lutur.

“Penyampau tu nyengkaum siku Lutur Pematih Bejaku, enam iku Raban Terapi Pekereja enggau lima iku Raban Fisioterapi.

“Sarawak agi napi penanggul suntuk lutur diambi gawa ba 55 buah PDK, tambah mega diatu palan PDK udah mayuh lepas dibagi ngagai sekeda enggau raban pengereja ti bepangkat pemesai tu mega udah dibagi ngagai berapa iti zon,” ku iya.

Fatimah munyi nya rambau Program Ngabas Menteri Pemansang Indu, Ruang Bilik enggau Komuniti (KPWKM) Renggat Nengeri Sarawak di PDK Sentuh Kasih, Kuching, ensana.

Berindik enggau nya, Fatimah madah Lutur Pematih Bejaku U41 patut dikemayuh agi laban ba selampur Sarawak diatu siku aja ba JKMS.

“Aku ngarap awakka Perintah Besai ulih nyediaka lebih mayuh Pematih ungkup OKU di Sarawak kelimpah raban fisioterapi ti udah dipatih deka diberi gaji nitihka tikas pelajar sida,” ku iya enggau silik.

Nangkan nya, Fatimah madah penyampau 1,733 OKU ari 55 buah PDK ti bisi ba palan nya lalu penyampau 351 iku nyereta diri ba sesi berubat(pemulihan) di rumah enggau 355 iku orang ti gawa di selampur PDK Sarawak.

Berebak enggau nya, Fatimah mega nyebut pasal elaun ti diberi ngagai supervisor enggau staf ti nerima penyampau RM1200 ungkup supervisor enggau RM800 ungkup staff.

“Sida ti gawa ba PDK tu nerima penuh elaun nya tang elaun nya enda dikumbai kitai gaji ungkup sida gawa di PDK.

“Tang sida tu gawa ninting hari enggau seruran bepangai ba elaun ti mimit nya,” ku iya.

Fatimah mega nandu, udah datai maya elaun sida ke gawa di PDK tu ditukar ngagai sistem gaji ti nitihka tikas pelajar sida.

“Meri sida tu gaji nitihka gred mega beguna amat laban deka sida ke gawa enggau JKMS tu enda lari mindah gawa kebukai.

“Pekara tu enti enda diberi perati sigi ngemai pengerugi ngagai anak enggau apai indai ti bepanggai ba sida ke gawa ti merubat sida OKU,” ku iya.