KUCHING: Teju ngagai Kepala Menteri Datuk Patinggi Abang Johari Tun Openg terus ngembing Sarawak, pia ku Datuk Seri Fadillah Yusof.

Mandal Kanan Parti Pesaka Bumiputera Bersatu (PBB) nya madah, bup rikod nunjukka Abang Johari bepengulih ngembing Sarawak pengudah nyadi Kepala Menteri nukar niang Pehin Sri Adenan Satem dalam taun 2017.

“Pekara ke nyengala dipeda kitai lebuh serap umur di Sarawak napi penusah ketegal pengerekai igi penyakit ba serata dunya.

“Taja Perintah Besai dipegai Perikatan Nasional (PN) nyuaka bemacham bantu, Perintah Sarawak mega ngereja pengawa ke sama nengah Bantu Khas Sarawakku Sayau (BKSS),” terang Fadillah.

Fadillah mansutka jaku nya lebuh Suara Sarawak enggau New Sarawak Tribune ngatur randau khas, ditu kemari.
Timpuh Dun Sarawak dipelaba abis dalam bulan June 2021 kelimpah meri peluang ungkup ngatur Pengawa Bepilih Nengeri Ke -12 (PRN12).

PRN-12 nya endur kitai meda Gempung Parti Sarawak (GPS) diiring Abang Johari bediri minta pilih pengudah ngaga pemutus numbuhka parti politik kediri lebuh ningkilka diri ari Barisan Nasional (BN) laban aprti nya alah lebuh Pengawa Bepilih Besai (PRU) 2018.

Fadillah ti mega Ketuai Whip GPS ba renggat Perintah Besai madah, BKSS udah semina nyelinting raban B40 aja tang nyengkaum bala nembiak, pedagang enggau raban ti tusah ketegal Covid-19.

“Perintah diiring Abang Johari tu keran dekaka hak Sarawak ti udah lenyau ba renggat Perintah Besai diambi pulai baru lalu iya seruran nagih hak nya.

“Kemari (Hari Empat), Sarawak nempa sejarah baru pengudah Petronas, serikat besai minyak enggau gis nasional udah mayar Chukai Jual enggau Servis (SST) 2019 penyampau RM2.9 bilion ngagai Perintah Sarawak,” ku iya nerang silik.

Iya ti mega Kaban Parlimen Petra Jaya madah, Perintah Sarawak bekenanas ngenyemak takah pemansang entara kandang menua ulu enggau mengeri ngena asil chukai SST nya.

“Nya kebuah, Kepala Menteri nadai kakang ngena agih belanja besai ungkup projek jematan, jalai alun, jalai alun tebing tasik, bekal ai sereta elektrik ungkup tuju nya.

“Pekara tu nunjukka iya siku orang ti ngembuan visyen enggau perambu besai ngemansangka Sarawak ngambi diangkat nyadi nengeri pemadu maju dalam Malaysia manggai taun 2030,” tandu iya.

Fadillah ti mega Menteri Kanan Infrastruktur madah, Sarawak nyingkang ke mua lebuh pengerekai Covid-19 beduduk aripolisi ekonomi digital ti dikemansang Abang Johari tu.

“Tebal agi, rayat Sarawak bedagang enggau bebelika barang online laban sida udah teleba ngena teknologi moden tu sekalika ba mengeri tauka ba menua pesisir.

“Nya alai, aku ngarapka rayat Sarawak deka milih Kepala Menteri maya PRN12 ila,” ku iya.