SARATOK: Bala ketuai raban bansa kelebih agi tuai rumah patut berani mantaika peminta, penanggul enggau sebana rayat.

Sapit Menteri Pengeluar Kuasa enggau Pengeraja Asal, Ali Biju madah, tuai rumah udah dipilih nyadi ketuai ngempung nembiak renggat baruh.

Nya alai ku iya, nembiak redak endang ngandalka tuai rumah bejakuka ngarika sida ba sebarang pengawa sekalika minta projek pemansang, mutarka penanggul enggau penusah ditapi rayat.

“Kita ti udah dipadu nyadi tuai rumah anang takut tauka nangi nganjung peminta, madahka penanggul enggau penusah ngagai aku empu tauka betemu enggau staf ba Palan Servis Komuniti din.

“Enti kita nadai madah nama utai ke nyadi ba renggat baruh, baka ni kami ke nyadi ketuai deka mutarka pekara nya. Nya alai, kitai mesti madah enggau terang enggau nyentuk.

“Baka aku empu ti nyadi pengari semua rayat nadai ngira kita negika bala ari PSB, PDP, PBB tauka parti bukai, tang ke diatu, aku mih pengari kita.

“Aku udah dipilih kita ngena undi ti mandangka pengandal kita ngagai aku mai pemansang enggau ngintu pengelantang. Nya alai aku lalu naka ulih bejalaika pangku pengawa diri empu,” ku iya madah nyemetak.

Ali mansutka jaku nya lebuh dikangau nyadi temuai dipebasa ba Program Berandau Enggau Rayat Rumah Blayong, Ulu Roban, Kabong ditu, malam tadi.

Berebak enggau nya, Ali udah ngagihka belanja nengah Projek Mit Pemansang Menua Pesisir (MRP) penyampau RM35,000 ngagai Rumah Blayong.

Agih belanja nya nyengkaum RM15,000 ungkup Projek Nyeleti Engkelebat Rumah Blayong, RM5,000 ungkup PA System, Komiti Pemansang enggau Pengelikun Genturung Pendiau (JKKK) nerima RM10,000 seraya Biro Indu ampit RM5,000.