SARATOK: Rayat menua pesisir diperansang ngemayuhka bansa utai tanam dikena nambahka penatai pemisi diri.

Sapit Menteri Pengeluar Kuasa enggau Pengeraja Asal, Ali Biju madah, sida patut ngemayuhka bansa utai tanam kelimpah ari nanam utai tanam komoditi baka getah, sawit, koko enggau lada.

Ku iya, pekara tu beguna amat ngambika sida enda kelalu bepanggai ba siti utai tanam aja laban rega utai tanam komoditi nemu niki enggau nurun.

“Kitai anang semina ngandal siti utai tanam kelimpah ari nanam lada enggau sawit dikena nambahka penatai pemisi enggau ngangkatka tikas pengidup.

“Ambika chunto, maya rega lada niki lantang mih ati kitai lalu mayuh mega rega diulih sekali nyual tang baka ni enti rega labuh, dia kitai temati kutu baka ni deka ngiga belanja lebih,” ku iya.

Ali mansutka jaku nya lebuh nyadi temuai dipebasa ba Program Randau Begulai Enggau Rayat ba Rumah Serudin Ason, Semambu Kabo, ditu kemari.

Iya madah, rayat patut pintar runding ngerebut sebarang peluang ti bisi disediaka opis enggau ejensi perintah baka Sitak Pemansang Betanam Betupi Begempung (IADA) dikena ngemajuka diri.

“Ukai kitai enda ulih ngandalka rega lada tauka sawit tang kitai bela nemu rega komoditi tu niki nurun nitihka rega ba makit dunya.

“Utai tanam bukai baka buah enggau sayur tu kira nyadika penabat kitai lebuh rega komoditi nurun nentuka kitai enda putus penatai pemisi.

“Tambah mega, mayuh penguntung ari kitai betanamka mayuh bansa utai tanam tu, ungkup dempa diri empu enggau dijual baka rian Musang King.

“Enti asil rian kelalu mayuh, tau digagaka empikau tauka diinjin nyadi produk bukai kena meri rega tambah ngagai asil dagang kitai. Nya baru kitai ulih maju nitihka singkang orang di mengeri,” ku Ali.