KUCHING: Gis tulen ti ditemu di Bukit Kanada, Miri kebendar salur gis baruh tanah ti bisi bumbus bekau ari pengawa ngali minyak mata ti udah lama ditinggal serikat petroleum kelia.

Sapit Presiden Gerempung Konteraktor Petroleum Sarawak (Speca), Ir Jamel Ibrahim madah, gis ti bumbus nya bekau ari pengawa ngali ari serikat minyak Shell urung taun 1910 nyentuk 1962.

“Telaga tu dulu udah ditutup, kebuah lama udah ditinggal nadai kala dipansik enggau diseleti ti ngujungka salur gis tu bisi bumbus.

“Salur gis bumbus tu sigi enda mai pemanah ba pengerai tauka pengelikun peranak besemak enggau Bukit Kanada tu,” ku iya.

Nangkan nya, penyampau 624 telaga minyak mata ditemu di genturung nya patut ditutup lalu peranak ba Bukit Kanada tu tau nagang diri ngelawa palan nya.

“Telaga minyak tu patut ditutup enggau likun sereta pengawa nyeleti palan nya patut dipejalai,”ku tandu iya.
Jamel madah munyi nya lebuh ditanya bala pemberita bekaul Gerempung Konteraktor Petroleum Sarawak (Speca) di Hotel Samudra, ensana.

Kelimpahnya, palan nya agi bedau ulih dikomersil nyadi palan ngali minyak mata laban ka nyeliah ari utai enda sadang nyadi kelebih agi ngagai pengelikun peranak Miri ditu Presiden Speca, Datuk Rahman Lariwoo madah, piak sida deka nganjung keretas kereja ngagai Perintah Sarawak enggau serikat petroleum baka Shell ungkup nutup enggau nyeleti palan nya.

“Kitai ngembuan mayuh pakar di menua tu empu ti ulih bejalaika pengawa nutup enggau nyeleti telaga minyak ti udah lama ditinggal nya.

“Kitai mega patut nyikap diri lebuh mantai keretas kereja ngagai Perintah Sarawak tauka Shell. Kebuah tu laban kitai enda nemu sapa ti ngempu tanggungpengawa ba palan ti kala ditujah Shell,” ku iya enggau silik.

Nambahnya, belanja nyeleti enggau nutup telaga minyak nya makai belanja ti besai.

“Ungkus belanja nyeleti enggau nutup telaga tu penyampau 50 peratus lebih baruh ari kos nutup telaga di tasik,” ku seraya ngelalau peranak di Miri patut bejimat lebuh besemak enggau palan nya.