KUCHING: Pemidang Datuk (Sarjan) Awang Raweng endang pengelenyau besai ngagai Sarawak, ku Ketuai Nembiak PRS Datuk Snowdan Lawan.

Ku iya, niang siku bujang berani ke enda takut ngagai leka peluru lalu nya engkeman amat enggau rambai jaku “agi idup agi ngelaban”.

“Penerima midul George Cross ari menua Malaysia nya endang mandangka pemerani ke bebidada enggau orang bukai.

“Iya mega siku ari Iban Tracker ke ngembuan pengelandik nyidi munsuh ba babas maya menua dipegai British,” ku iya maya dirandau Suara Sarawak.

Snowdan ke mega Menteri Muda Nembiak enggau Lumba meri penyinu ati ngagai sida niang Awang sebilik.

Berebak enggau nya, Kaban Parlimen Kapit ke mega Menteri Dagang Dalam Menua enggau Pekara Penguna Datuk Alexander Nanta Linggi mega ngenataika penyinu ati ngagai sida niang sebilik nengah laman Facebook.