KUCHING: Pemidang niang Datuk (Sarjan) Awang Raweng ke mega penerima midul George Cross tentu siti pengelenyau besai ba raban bujang berani.

Sapit Kepala Menteri Tan Sri James Jemut Masing madah, bujang berani Iban nya udah nyaup ngetanka Malaysia ari dipegai komunis.

“Niang deka terus dikenang nyadi anak Sarawak ke pemadu berani enggau nadai alai manding.

“Ngenataika penyinu ati ngagai sida niang sebilik,” ku iya maya dirandau Suara Sarawak lemai ensana.

Awang ke udah manggai umur 104 taun ensana siku ari Iban Tracker ke gawa ba Tanah Malaya urung bulan Disember 1950 sebedau dipasuk ngagai Rejimen Worcestershire ke bepengkalan ba Kluang rambau ngelaban komunis.

Niang dikenuku midang ba rumah anak iya Panggau Awang ba Taman Padri di Sri Aman. Urung pukul 10 pagitu tadi (20 Sept) niang dibai ke Dewan Suarah Kuching ngambika disengai mensia mayuh renggat nengeri.

Pagila (21 Sept) niang deka disembiangka dulu ba Gerija St Thomas Kuching sebedau dianjung ke Pendam Bujang Berani ba Taman Budaya ditu.