SARATOK: Berita pemidang bujang berani menua, Datuk Awang Raweng lemai kemari mai semua kitai berasai sinu sempama lenyau ‘siti tajau ke pemadu berega’.

Sapit Menteri Pengeluar Kuasa enggau Pengeraja Asal, Ali Biju madah, pemerani niang berambunka nyawa lebuh ngetanka menua suba patut diteladan.

Ku iya, niang beberita ketegal pemerani iya dataika ulih ngidupka seput siku soldadu British lebuh beperang ngelaban soldadu Jipun ngujungka iya nerima Midul George Cross ari Queen Elizabeth.

“Berasai sinu endar ati lebuh nerima berita nya, dulu aku besampika semengat tudah niang diau likun enggau lantang ba menua sepiak nyin.

“Niang tu tau dikumbai kitai chukup gayu, nitih jaku sida ke tuai kira ke pulai mih iya tu,” ku iya lebuh dirandau Suara Sarawak.

Ali madah, perang dulu menya kitai begunaka pemerani megai senyata, nimbak munsuh, tang perang kemaya hari tu kitai ngena pemintar runding enggau berani berubah.

“Teladan mih pemerani bujang berani kitai tu. Iya ukai semina berani tang mega kasihka kaban dataika sanggup ngadai nyawa diri empu.

“Semangat bujang berani niang tu mih ke patut dikembuan genap iku kitai, beperang ngelaban munsuh ti enda dipeda mata baka Covid-19 diatu,” ku iya ti mega Kaban Parlimen Saratok enggau Adun Krian.

Ngena peluang tu, Ali meri penyinu ati ngagai sida niang sebilik enggau kaban belayan iya lalu ngarapka sida liat ati napi penguji besai tu.