KUCHING: Bujang Berani Datuk (Sarjan) Dr Awang Raweng mujur disembiangka Revd Father Nigel Manjan ari Gerija St. Thomas lemai tu tadi.

Pengawa besembiangka niang Awang berengkah pukul tujuh lemai di Dewan Suarah Kuching.

Bala kaban belayan sereta mensia mayuh entara orang ke bisi datai ngulu pengawa besembiang nya nyengkaum bala anak iya empu.

Sama bisi datai Uskup Gereja Anglikan di Sarawak enggau Brunei Datuk Rt Rev Danald Jute sereta bala bukai.

Udah nya niang lalu disengai betuaika Penghulu Adi Jala ti nyerita sentang kisah pengidup niang maya agi idup.

MINTA BEREKAT…Entara bala ke bisi datai ungkup pengawa sembiang di Dewan Suarah Kuching lemai tadi.

Iya deka dikuburka ba Pendam Bujang Berani pagila nitihka adat soldadu sereta basa ngagai bujang berani menua.

Awang nadai kena Hari Lima tu tadi di Taman Padri, Sri Aman.

Niang ke beumur 104 taun kala nirika rumah tangga tiga kali lalu ngembuan sembilan iku anak.

Pemerani Awang tampak lebuh iya nyelamatka siku soldadu British ke benama Hughes.

Iya lalu dipebasa nerima anugerah George Cross kena 20 November 1951.

Kelimpah anugerah George Cross, Awang mega nerima anugerah Panglima Setia Bintang Sarawak ari Perintah Sarawak ba taun 2018 enggau Pingat Jasa Malaysia ba taun 2011.

Dulu ari nya, bujang berani tu mega bisi nerima anugerah Queen Elizabeth II Diamond Jubilee Medal 2012, Queen Elizabeth II Golden Jubilee Medal 2002, Queen Elizabeth II Silver Jubilee Medal 1977 enggau Queen Elizabeth II Coronation Medal 1953.

Niang kala nerima Ijazah (Pemadu Tinggi -PhD) Sarjana Pengajian Strategik ari Universiti Pertahanan Nasional Malaysia kena 27 Oktober 2015.