KUCHING: Program Pemansang Pedagang Mikro Pengintu Pengelantang Sarawak (PPUMK) ulih nyadi chuan teladan ngagai nengeri bukai ba pengawa mantu komuniti nyungkak penatai pemisi ba raban komuniti di menua tu.
Komuniti ti dikemeran ngaul diri enggau program tu iya nya orang nyelai pendiau(OKU), orang tuai, ruang bilik seranta enggau indai tunggal.

Sapit Menteri Pemansang, Orang Indu, Ruang Bilik enggau Komuniti, Datuk Siti Zailah Mohd Yusof madah, piak sida deka meri perati enggau mai pekara tu ngagai piak opis menteri awakka mansik sereta meransang nengeri bukai mega bejalaika projek baka tu ti meri pemaik ngagai rayat.

“Naka tu, aku bedau meda program baka tu dipejalai ba nengeri bukai, nya alai nengeri bukai patut nunda Sarawak program baka diatur tu.

“Kitai ngembuan mayuh ejensi ti ulih mantu rayat ba pengawa nyungkak ekonomi sida.

” Nya alai aku ngarap ari kerejasama nengah koperasi tu ulih meri mayuh pemaik ngagai rayat ti ngemansut diri ari tikas penyeranta, “ku iya.

Nangkan nya, program nya ulih mutarka penanggul ruang bilik ti kurang penatai pemisi kelimpah sida ti seruran bepanggai ba bantu ari Perintah.

Siti madah munyi nya lebuh ditanya raban pemberita ba Program Nemuai Menteri Pemansang Orang Indu, Ruang Bilik enggau Komuniti (KPWKM) Edisi Sarawak di Wisma Koperasi Usahawan Mikro Kebajikan (Kousmik), Matang, apin lama ke udah.