Rozlina Bilong, 44 siku penanyi lama Iban ke benung nembuka siti album baru ungkup peminat iya di menua tu.
Indu Kenyah ke ngembuan patah nyawa ti chukup manah tu ngepunka singkang diri ba dunya pemerindang lagu Iban ngena lagu ‘Selamat Malam Sulu’.

Bepun ari nya, nama Rozlina majak dikelala seikas enggau penyanyi bukai baka Alice Awis, Angela Lata Jua, Stella Philip enggau ke bukai lalu lagu iya majak dipilih mensia mayuh maya bisi pengerami belagu karoke.

Dalam album Selamat Malam Sulu, Rozlina bisi nyadaka lagu bepadu enggau enggau penanyi tebilang niang Michael Jemat nengah lagu ke diberi nama Buk.

Kelimpah ari nya, Rozlina mega kala bepadu nyawa enggau penanyi lelaki ti bukai baka Wilson, Nai Dinamik enggau Stevenson.

Entara lagu tebilang kala disada Rozlina iya nya Anang Berumban, Enda Betah, Kempang, Dinga Meh Dara, Sama Nanggam Pengerindu, Lelenggau Ke Nuan, Sama Rindu, Nesal enggau ke bukai.

MERINDANG…Rozlina maya dikangau merindang ba sebengkah pengerami di menua tu.

Apin lama ke udah, Suara Sarawak bisi ngerandau Rozlina sereta nanya sentang pejalai pengidup iya dalam industri muzik Iban.

Rozlina ngepunka randau madahka diri datai ari Sungai Asap, Belaga.

“Aku sekula naka STPM lalu diatu aku bisi siku anak indu. Kami menyadi bisi empat iku lalu aku anak lumur tiga,” ku iya.

Ngenang pasal pejalai tama dalam industri muzik Iban, Rozlina madah sukung ari peminat ngasuh iya lama beretan dalam industri tu.

“Ari album keterubah Selamat Malam Sulu dataika album pemadu baru iya nya Nyabak Rangkai ti keluar ba taun 2015 sambut ari peminat chukup manah.

“Aku belagu ba baruh perabung LUH Production lalu diatu aku agi mengkang dalam proses deka ngeluarka album baru.

“Kelimpah belagu aku mega rinduka pengawa ngaduka pemajik gamal,” ku iya.

Iya enda putus meri pengaga ati ngagai bala peminat ti seruran enda leju meri sukung ngagai iya ba industri muzik Iban.

“Aku ngarapka diri mujur ayan baru ba industri muzik Iban sereta mai lagu baru nitihka sera bala peninga.

“Terima kasih ngagai bala peminat ti seruran meri sukung sereta terus meh sukung industri muzik kitai Dayak,” ku iya.