KUCHING: Sarawak lenyau siku bujang berani ke ngembuan sejarah ti ditemegah kitai, pia ku Datuk Seri Wan Junaidi Tuanku Jafaar lebuh ngelansa pasal pemidang siku penerima midul George Cross Datuk (Sarjan) Awang Rawing, ditu kemari.

Wan Junaidi ti mega Kaban Parlimen Santubong madah, niang Awang Rawing nya entara Iban Tracker ba Semenanjung Malaysia dalam taun 1950-an.

“Lebuh nya, iya udah mantaika pemerani diri ngagai piak British dataika iya diberi midul George Cross.

“Midul nya sama tinggi enggau Victoria Cross enti niang Awang gawa nyadi soldadu tang iya semina gawa enda lama aja,” ku iya lebuh dirandau Suara Sarawak.

Wan Junaidi ti mega Menteri Pemansang Orang Dagang enggau Gerempung Kerejasama berasai sinu ngenang pemidang niang Awang tu.

“Berindik ari penau iya, Awang keran nyadi soldadu pengudah Malaysia ditumbuh nyadi siti menua.

“Iya mega udah nyerungkai peluang ba bidang soldadu enggau polis pengudah penumbuh Malaysia,” terang iya.

Berebak enggau nya, Wan Junaidi ti ngembuan peneleba ba bidang polis ngenataika penyinu ati ngagai sida niang sebilik.

Awang Rawing madamka seput maya umur 104 taun kemari lalu iya mega siku Iban Tracker ngagai Tanah Melayu dalam bulan Disember 1950 sebedau diambi gawa dalam Rejimen Worcestershire di Kluang ngambi ngelaban komunis.