KUCHING: Komiti Penyangga Penusah Ngenyit Nengeri (JPBN) mantaika siti agi Atur Pengawa Standard (SOP) baru ngagai rayat menua luar ti deka tama ke Sarawak nengah Palan Penerebai Bilun Entarabansa Kuala Lumpur (KLIA).

Pemutus aum komiti nya kemari dibantaika dalam siti penerang media ti madahka semua rayat menua luar ti deka tama ke Sarawak nengah pintu tama KLIA deka dikuarantin dulu ba Kuala Lumpur sebedau tama kitu.

Kelimpah ari nya, JPBN madah seharitu nadai kes positif baru Covid-19 dirikodka ba Sarawak lalu penyampau kes positif Covid-19 di Sarawak mengkang 701 kes.

Kluster Alam di Bintulu agi nyadi kluster benung ngerekai lebuh ngerikodka lapan kes.

Taja pia, semua kes tu udah suman sereta dikemendarka pansut ari sepital.

Nya ngujungka kes suman sereta pansut ari sepital naka kediatu mengkang 680 kes.

Penyampau kes ti agi diperubat ba sepital mengkang dua iya nya siku di Sepital Sibu enggau siku di Sepital Sungai Buloh, Selangor.

Penyampau pemati ketegal Covid-19 di Sarawak mega mengkang 19 iku.

Kemari JPBN madahka, bisi lima kes pesakit agi dipatau (PUI) baru dirikodka tang nadai kes PUI nganti peresa makmal.