SPAOH: Pasar Spaoh udah tu dipelaba begunaka mayuh agi tanah ungkup projek pemansang, pia ku Sapit Kepala Menteri Datuk Amar Douglas Uggah.

Ku iya, pemansang ti deka digaga ba Spaoh mungkur begunan kedai baru, opis perintah enggau rumah ungkup orang gawa sereta genturung pendiau.

“Aku deka mantaika pekara tu ngagai Kepala Menteri Datuk Patinggi Abang Johari Tun Openg maya iya ngatur pejalai nemuai ngagai Betong dalam minggu siti nyin ila,” ku iya.

Uggah ti mega Adun Bukit Saban mansutka jaku nya lebuh ngelanchar Program Betanam Betupi Ngaul Komuniti (AgriCOP) di Opis Betanam Betupi, ditu kemari.

Nambahka nya ku iya, lebuh Betong enggau Mukah nyadi palan tibang pemakai, Sadok deka nyadi mengeri agropolitan laban Spaoh maju ari ba pengawa betanam betupi enggau ngembuan mayuh tanah ba menua ulu.

“Nya kebuah perintah deka numbuh sebuah padang bilun tauka tauka Palan Terebai enggau Terengkah (STOLport) ungkup pemakai perengka pengangkut langit ti diasilka ditu.

“Nangkan nya, mayuh agi infrastruktur baru udah disikap baka jematan ikonik baru ba seberai Sungai Paku, palan pengatur pengawa,

“Pia mega, perintah udah ngemanah sistem entali ai enggau parit sereta jalai kebun,” ku Uggah.