MIRI: Lebih 500 pek bantu pemakai dianjung ngagai 12 kandang menua ti napi penusah bah ba Pelilih Tinjar ditu ngena bot ekspres, ditu kemari.

Ketuai Opis Bomba enggau Penyah Penusah Miri, Law Poh Kiong madah, bantu pemakai nya dianjung Opis Pengintu Pengelantang Mensia Mayuh (JKM).

Ku iya, entara endur nganjung bantu tu iya nya ba Sekula Primari (SK) Long Teran, Klinik Long Teran, Kampung Long Teran Kiri, Long Teran Kanan, Long Teran Kanan B, Long Teran Batu, Rumah Jarau Long Tabing, Rumah Joben LongTabing, Rumah Francis Ubi Long Jegan, SK Long Jegan, Klinik Long Jegan enggau Rumah Dennis Long Jegan.

“Bisi 576 bantu pemakai udah mujur dianjung ngagai genturung pendiau tu.

“Menteri Muda Kaunsil Kandang Menua enggau Pengawa Berumah ti mega Adun Marudi, Datuk Dr Penguang Manggil mega udah ngulu pengawa nya,” ku iya nerang.