KUCHING: John Nyigor dichiri nyadi Sekretari Politik Kepala Menteri Datuk Patinggi Abang Johari Tun Openg.

Iya udah angkat sumpah ba mua Sapit Kepala Menteri Datuk Amar Douglas Uggah Embas di Wisma Bapa Malaysia, ditu kemari.

John mangku pengawa nya pengelama dua taun, bepun taun tu nyentuk taun 2022.

Ungkup rikod, John mega kala mangku pengawa dalam Parti Pesaka Bumiputera Bersatu (PBB) enggau Sayap Raban Nembiak PBB.

Pia mega, iya mega ngaul diri dalam gerempung ukai dikuasa perintah (NGO) bukai baka Dewan Usahawan Bumiputera Sarawak (DUBS), Serakup Nasional Dayak Bidayuh (DBNA), Serakup Pinchin Soldadu Malaysia enggau Institusyen Sekretari enggau Pengatur Pengawa Berkanun Malaysia (Maicsa).

Ngelansa pasal penyulut, John mega kala diberi anugerah Johan Setia Mahkota (JSM), Kesatria Mangku Negara (KSM), Pegawai Bintang Sarawak (PBS) enggau Bentara Bintang Sarawak (BBS).