KUCHING: Sekula Peribit Entarabansa Keterubah diempu Perintah Sarawak nengah Yayasan Sarawak deka didiri ba Batu 12, Jalai Penrissen, Kuching.

Kepala Menteri Datuk Patinggi Abang Johari Tun Openg madah, batang tuju penumbuh sekula peribit tu deka ngangkatka sektor pelajar menua tu.

Ku iya, sekula nya mega dikena ngangkatka pemanah pelajar kelimpah ngenyemak takah pengidup ba mengeri enggau menua pesisir sereta ngemanah tikas idup komuniti nengah pekara pelajar.

“Pelajar tu utai pemadu beguna dikena munaska penyeranta sereta ulih mutarka penanggul penatai pemisi ke enda sebela ba mengeri enggau menua pesisir.

“Tu strategi beranakka puku dudi hari lebuh nempa rebak ti pintar enggau bepenau ba mayuh pengawa,” ku iya.

Abang Johari mansutka jaku nya lebuh bejadika taba projek Sekula Entarabansa Keterubah Sarawak ditu tadi.