BETONG: Komuniti enggau polis patut besaup enggau begulai gawa nagang enggau ngemunaska sebarang penyalah.

Sapit Menteri Pengeluar Kuasa enggau Pengeraja Asal, Ali Biju madah, juluk tu ulih dijapai nengah chara Komuniti Ngaul Polis.

Ku iya, komuniti enggau polis bela begunaka pangan diri lebuh mutarka sebarang penanggul ngaul penyalah ti nyadi besemak sida.

“Bala JKKK teleba agi pasal gaya genturung pendiau sida lalu nemu ulah siku-siku, nya alai ari saup komiti tu piak polis ulih nagang penyalah ngena chara ngasi agi.

“Sebagi ari chara dikena raban polis iya nya ngena servis bala JKKK lebuh bejalaika operasyen nagang penyalah ke ditemu nyadi ba genturung pendiau nya.

“Nya alai, bengkel baka tu ngembuan tuju terang endar, mai komuniti sedarka tanggungpengawa sida lalu nyaup bala polis gawa nentuka genturung pendiau likun enggau lantang endur diau,” ku penemu iya.

Ali mansutka penemu nya lebuh ditanya pemberita senentang Program Bengkel Polis Komuniti Ungkup Komiti Pemansang enggau Pengelikun Genturung Pendiau (JKKK) Bagi Menua Betong ba Balai Opis Pelilih Saratok ditu.

Ungkup penerang, program lapan hari berunggu nya diatur Opis Pelilih Saratok betuju meri penerang pasal pangku pengawa Polis Komuniti enggau chara sida gawa.

Bala penyereta bengkel udah mendingka licha ti diatur begintir entara bala pemesai ari Opis Pelilih Saratok, Ejensi Anti Dadah Nasional (AADK), raban Polis DiRaja Malaysia (PDRM) Saratok enggau Opis Veterinar Betong.

Dulu ari nya, Ali ti mega Adun Krian udah ngulu Program Randau Begulai enggau Rayat ba Rumah Wilfred Ukik, Sungai Brangan ditu, lemai Hari Minggu tu tadi.

Iya udah ngagihka belanja Projek Mit Pemansang Menua Pesisir (MRP) penyampau RM15,000 ngagai JKKK Rumah Wilfred enggau Biro Indu sida nerima RM5,000.

Berita penuh Ruai 4 pagila.