KUCHING: Gempung Parti Sarawak (GPS) enda nyukung Parti Keadilan Rakyat (PKR) numbuhka Perintah Besai, ku Menteri Dagang Dalam Menua enggau Pekara Pengguna (KPDNHEP), Datuk Alexander Nanta Linggi.

Nanta ti mega Sekretari Besai Parti Pesaka Bumiputera Bersatu (PBB) madah, Datuk Seri Anwar Ibrahim (Ketuai PKR) anang empelita enggau isu politik ti semina nguntungka diri empu aja.

“GPS semampai tegap penemu meri sukung ngagai perintah Perikatan Nasional (PN) betuaika Menteri Besai Tan Sri Muhyiddin Yassin.

“Anwar patut badu nguji ngeruga penegap menua laban pengawa nya deka meri pengerugi ngagai rayat enggau ekonomi menua,” ku iya.

Nanta madah, Nengeri Sarawak betuaika Kepala Menteri Datuk Patinggi Abang Johari Openg semampai meri sukung penuh ngagai Perintah PN.

“Kepala Menteri Sarawak udah mai mayuh pemaik ngagai Perintah Besai enggau Nengeri Sarawak,” ku iya madah nyemetak.

Berindik enggau nya, Parti GPS datai ari PBB, Parti Sa’ati Rayat Sarawak (SUPP), Parti Rayat Sarawak (PRS) enggau Parti Demokratik Progresif Sarawak (PDP) mega sepenemu nyukung Perintah PN.