SERIAN: Kepala Menteri Datuk Patinggi Abang Johari Tun Openg sekali agi tegap penemu madahka GPS nyukung Menteri Besai Tan Sri Muhyiddin Yassin.

Beserimbai enggau Pengerami Hari Malaysia ba Sibu kena 16 September tu tadi, Abang Johari ti mega Chairman GPS madahka diri meri sukung tegut ngagai Perintah Perikatan Nasional (PN) di baruh Muhyiddin.

Berebak enggau nya, Abang Johari ti mega Adun Satok ningkah, nadai Kaban Parlimen GPS engkechit parti lalu nyukung Presiden PKR Datuk Seri Anwar Ibrahim nyadi Menteri Besai.

“Aku nadai nemu baka ni iya (Anwar) nerima sukung majoriti nyadi Menteri Besai.

“GPS sigi nyukung Muhyiddin lalu pekara nya udah dipadahka aku lebuh ngintu Hari Malaysia tu tadi,” ku iya.

Abang Johari mansutka jaku nya ba aum pemberita lebuh dipinta ngelanasa pasal Anwar madahka diri nerima sukung ngambika iya ulih angkat sumpah nyadi Menteri Besai nukar Muhyiddin pengudah ngulu Program Ketuai Begulai enggau Rayat, ditu tadi.

Nambahka nya ku Abang Johari, iya nadai kala betemu enggau telefon ngagai Anwar pasal isu nya.