KUALA LUMPUR: Menteri Besai Tan Sri Muhyiddin Yassin kemari madahka rayat deka nerima inisiatif enggau bantu tambah ungkup ketuai bilik B40 enggau M40.

“Di baruh pakej Langkar Inisiatif Tambah Prihatin tauka Bantu Prihatin Nasional 2.0 (BPN 2.0), pakej tu nagit raban B40 enggau M40 ti beruang bilik enggau bujang, pengereja ba mayuh pengawa enggau raban pedagang mikro.

“Bantu nya sebagi ari pakej penyuman ekonomi BPN 2.0 ungkup mantu rayat Malaysia ngelempung tating penusah ketegal pengerekai Covid-19,” ku iya.

Nya alai, Muhyiddin mega madahka Perintah udah melanja RM11.2 bilion ungkup BPN ti deka meri pemaik ngagai 10.6 juta penerima.

“Ungkup raban B40, sida deka nerima RM700 ba bayar keterubah bulan Oktober tu lalu bayar kedua ba bulan Januari 2021 penyampau RM300 seraya orang bujang deka nerima RM500.

“Ungkup raban M40, ketuai bilik deka nerima RM600 seraya orang bujang deka nerima RM300.

Nambahka nya ku iya, sida ti kala nerima BPN sebedau tu enda ibuh nganjung peminta baru laban Perintah deka meri bantu nya terus ngagai 10.6 juta penerima ti udah dikemendar di baruh BPN sebedau tu.

“Perintah mega deka meri peluang ngapil enggau nganjung peminta baru ngagai sida ke patut nerima tang nadai bulih BPN sebedau tu,” tandu iya.