KUCHING: Sarawak mengkang nadai ngerikod kes baru positif Covid-19 ngujungka menua tu ngerikod 703 kes naka seharitu.

Komiti Penyangga Penusah Ngenyit Nengeri (JPBN) Sarawak madah, naka seharitu mega Kluster Alam di Bintulu ti agi ngerekai ngaul lapan kes.

“Semua kes dalam kluster tu udah suman enggau dikemendar pansut ari sepital,” ku penerang nya tadi.

Nambahka nya, JPBN madah nadai kes baru ti udah suman enggau dikemendar pasnut ari Sepital Sibu kemari ngujungka kes positif Covid-19 ti udah suman enggau dikemendar pansut ari sepital mengkang 681 iku tauka 96.87 peratus.

“Bisi tiga kes agi diperubat ba wad isolasyen iya nya bela siku ba Hospital Sungai Buloh Selangor, Sepital Besai Sarawak (SGH) enggau Sepital Bintulu.

“Nadai kes diperubat ba Unit Sakit Raya (ICU) kemari lalu bisi siti kes diripotka ba Sandakan Sabah ke benung diperubat ba Sepital Bintulu.

Nambahka nya, kes pemati mengkang 19 iku tauka 2.70 peratus.

Pia mega, Sarawak ngerikod semilan PUI baru lalu nadai PUI nganti pemutus makmal.

Nangkan nya, piak PDRM udah ngeluarka dua kompaun iya nya bela siti ba Miri enggau Kota Samarahan ketegal enda nitihka Atur Pengawa Standard (SOP).

Opis Menteri Kaunsil Kandang Menua enggau Pengawa Berumah udah ngeluarka 121 jaku tangkan, betulis enggau ngerampas barang di baruh kandang menua pegai BDA iya nya 53 amaran, DBKU (21), Kaunsil Pelilih Marudi (19), Majlis Perbandaran Sibu (16), Kaunsil Pelilih Meradong enggau Julau (8), MPKS (3) enggau Majlis Bandaraya Miri (1).