MIRI: Berambaika jaku Puchong Mali Rampung, Batu Pengerak Bala, Serakup Seni Kuntau Helang 12 (PSKH12) Miri udah miring nirika Gawai Sandau Hari, apin lama ke udah.

Gawai nya udah diatur ba kelang kuntau serakup nya di Pujut 3, Miri betuaika Guro Serai Ngaw.

Ngelalu penatai Guro Kuntau ti mega Presiden PSKH12 Serai Ngaw, Sapit Presiden Samuel Eddy Lau disempulang bala exco, Kaban Komiti (AJK) enggau raban bukai ngagai gelanggang kuntau mungkal pengawa sehari nya.

Serak tu, Suara Sarawak udah ngerandau Presiden iya, Serai Ngaw sentang tuju pengawa miring Gawai Sandau Hari diatur PSKH12 nya.

Ku Guro Serai, iya udah ngerurun pengawa miring Gawai Sandau Hari tu ungkup penemu bala mayuh.

KENA BEGAWAI… Indai Francis mangku atau jani ba atas tawak dikena begawai.

Nyadi siku ari Guro Kuntau, Guro Serai endang balat ngemeran pengawa miring, iya nya sebagi ari jalai pengarap lama raban bansa Iban.

“Kami ngena piring lapan, empat kali perunggu ungkup dalam kelang nya.

“Guro Ngaban bebiauka piring kelang, piring tubuh enggau bebiauka jani ti deka dibunuh sehari nya sebedau ngulihka atau iya.

“Sebedau dibunuh, jani nya dulu diberi makai, diunsut minyak lalu disugu manah.

“Udah nya, siku indu dikelala benama Indai Francis diasuh duduk atas tawak seraya mangku atau jani lebuh miring.

“Kami mega bisi ngaduka piring ungkup bala nembiak ti bisi ngulu gawai sehari nya,” ku iya nerang silik.

Guro Serai madah, bansa Iban diatu mengkang ngemeran adat lama ti ditampung ari aki ini kitai kelia taja dunya majak mansang.

Ngelansa silik, Serai madahka Gawai Sandau hari tu diatur dikena nela nasip orang.

“Nyadi, Gawai Sandau Hari tu dikena nela nasip orang sekalika bisi tuah tauka penusah ke tau nyadi ngagai iya nyengkaum nela pekara ke enda disadang nyadi.

“Tebal agi, bansa Iban deka nela nasip sida ari kenyap tauka ari orang bukai,” lansa iya.

Lebuh nela nasip ba atau jani nya, PSKH12 bisi ngangauka Guro Ngaban laban iya siku orang ti bepenau, bepenemu sereta ditemu landik nela nasip.

Ku Guro Serai, Guro Ngaban mega udah bebiau enggau besampi minta berekat ngambika pengawa sida sehari nya mujur enggau lanchar magang.

“Guro Ngaban udah dikangau bala kami laban iya sigi ditemu landik nela nasip enggau bebiau.

“Kitai Iban suah ngena atau jani lebuh nela nasip orang laban ba pengawa tu, nasip orang nya semina ulih ditemu enggau ditela ngena atau jani.

“Sebedau ngepunka pengawa nya, Guro Ngaban dulu bebiau dikena merekat semua kaban kuntau, bala temuai enggau utai bukai baka pemakai enggau ai irup dalam gelanggang nya,” terang Serai pasal pengawa tu.

BEBIAU… Guro Ngaban bebiauka piring kelang, piring tubuh enggau bebiauka jani ti deka dibunuh sebedau ngulihka atau jani.

Nambahka nya ku iya, bansa Iban deka miring dulu ngambi merekatka peminta enggau minta lindung Petara ari semua pekara ke tau ngachau.

Nya kebuah ku Serai, semua rurun pengawa tu mesti dipejalai enggau manah nentuka pengawa tu mujur.

Pengudah ngatur pengawa miring Gawai Sandau Hari nya, PSKH12 mega ngatur pengawa tembu kuntau.

Pengawa tembu kuntau tu nandaka tiap nembiak kuntau udah belajarka bungai kuntau pengelama tujuh hari ba tiap renggat nya.

Nangkan nya ku iya, nembiak ti tembu kuntau tu udah belajarka kuntau renggat ketiga iya nya belajarka bungai Dam Dam enggau Pencha.

NIKIKA PENGABANG… Penatai bala temuai ngagai kelang betuaika Guro Serai Ngaw.

Ba lansa bukai, Guro Serai madahka diatu bisi 180 nembiak ti udah nyereta pengawa belajar kuntau.

Ku Guro Serai, sida ngelaluka penatai nembiak ti deka belajarka seni kuntau adat asal Iban.

“Bala nembiak dikelalu belajar kuntau lalu PSKH12 deka ngajar bungai kuntau Helang Spring 12.

“Nyadi, bala nembiak deka belajarka tujuh bansa kuntau ba PSKH12 tu,” ku iya ngelansa pasal bungai kuntau ke deka dipelajar sida.

Berebak enggau nya, bala nembiak deka diajar kuntau nitihka renggat.

NGEPUNKA PIRING… Jani dulu diberi makai, diunsut minyak lalu disugu sebedau dibunuh.

Guro Serai mega madah, Serakup tu ditumbuh ngambi nyerakup raban bansa Dayak ba Sarawak lalu ngangkatka seni kuntau Iban ngambi enda midang diserunyut arus pemansang dunya.

Ungkup penerang silik tauka tanya bukai pasal belajarka kuntau Iban ba PSKH12 tu, kitai tau telefon ngagai Presiden Guro Serai (0148926106), Sapit Presiden Samuel Eddy (0128528766) enggau Sekretari Felix Enteri Telajan (0178047379).

Mensia mayuh mega tau meda aktiviti dipejalai PSKH12 ba Facebook Pages, PSKH12 “PERSATUAN SENI KUNTAU LANG 12 MIRI” tauka Facebook Pages GURO SERAI “GURO SERAI”.

TAMAT… Bala nembiak ti udah tembu belajar kuntau sama enggau pengawa ngintu gawai sandau hari tu.