ENGKILILI: Prinsipal Sekula Sekondari (SMK) Engkilili, Dickson Palot Malintan madah surat kabar entara kereban bacha ke manah dikena nambahka penemu raban nembiak sekula.

Nya alai siti pengawa ke chukup manah lebuh kompeni SV Sdn Bhd bisi meri surat kabar Suara Sarawak (SS) enggau News Sarawak Tribune (NST) pechuma ungkup dibacha bala nembiak ditu kelimpah nambahka kereban bacha ke bisi ba Librari Sekula (PSS).

“Nembiak patut rajin macha surat kabar awakka nemu pekara ke pemadu baru nyadi ba sesebengkah menua sekalika ba dalam menua enggau luar.

“Taja udah bisi perengka digital baka ari telefon binching, tang ngarapka pelasar surat kabar ngemuntang agi nembiak macha laban ukai semua sida bisi ngembuan telefon binching enggau perengka guna baka internet.

“Arapka isu-isu baru enggau berita ke dibacha ulih nambahka penemu sida ungkup pekara pelajar dalam kelas. Pia mega, pengawa macha surat kabar tu dikeandal ulih ngisi awak lepas sida enggau aktiviti ke beguna sereta nerenak ulah rindu macha,” ku iya.

MACHA BERITA…Sekeda nembiak SMK Engkilili benung jenuh macha surat kabar Suara Sarawak enggau Sarawak Tribune ke disadung ngagai sekula nya.

Dickson madah munyi nya lebuh dirandau pemberita bekaul enggau pemeri surat kabar pechuma ngagai sekula nya lemai ensana.

Terima kasih ngagai piak SV ungkup pengawa manah tu lalau arapka iya terus dipejalai ungkup timpuh panjai, ku iya.

Ungkup penerang, SMK Engkilili (SMKE) belabuh nerima surat kabar Suara Sarawak enggau News Sarawak Tribune berengkah pun bulan September tu tadi lalu deka terus nerima pemeri tu nitihka gintir.

SMKE bisi 1128 iku nembiak lalu nyadi sekula keterubah dibaruh Opis Pelajar Pelilih (PPD) Lubok Antu ditu ke bisi nerima pemeri tu.