SERIAN: Kaban Parlimen (YB) ari Gempung Parti Sarawak (GPS) nadai nyukung Datuk Seri Anwar Ibrahim, pia ku Sapit Presiden Parti Pesaka Bumiputera Bersatu (PBB) Datuk Seri Stephen Rundi Utom.

Nya alai, iya ti mega Menteri Utiliti nyemetak madahka GPS nadai kaul enggau Presiden PKR nya.
“Ari GPS nadai, lalu pengawa dikereja iya (Anwar) nya nyangka berundingka diri empu aja enggau GPS nadai kaul ba pekara nya,” ku iya.

Rundi mansutka jaku nya lebuh dirandau pemberita pengudah nyempulang Kepala Menteri Datuk Patinggi Abang Johari Tun Openg ngabas Tangki Ai Beresi Slabi, ditu kemari..

Rundi ngelansa pasal penerang madahka bisi Kaban Parlimen GPS ti nyukung Anwar dikena numbuhka Perintah Besai ti baru.

Anwar ti mega Kaban Parlimen Port Dickson kemari udah madahka diri bulih sukung majoriti Kaban Parlimen ngambi numbuhka Perintah Besai.

Iya madah majoriti besai ti diterima iya lalu ukai majoriti mit.

Pasal nama Kaban Parlimen ti nyukung iya, Anwar semina madahka sida nya datai ari pengari rayat mayuh parti.
Ketuai penyakal nya ngaku, Kaban Parlimen ti nyukung iya tu ari Umno enggau Pas ungkup perintah baru iya.