KUCHING: Nadai bisi atur netapka orang ti mai basikal mesti bisi lisin, ku Hasbi Habibollah.

Sapit Menteri Perengka Pengangkut nya madahka sida nadai kala berandau tauka merambu deka netapka lisin ungkup orang ti mai basikal.

“Apin lama media rama bisi begau sentang jaku ti madahka penguna basikal deka diasuh ngena lumur plat enggau lisin.

“Tang kebendar iya, aku udah mantaika jurai pasal RUU bagi ubah Akta Pengangkutan Jalan (APJ) ba Aum Parlimen,” ku iya madah ngagai pemberita lebuh ngulu pengawa Bejadika Program Nutup Value Assesment Lab for the Northern Coastal Highway di Palan Konvensyen Penview Kuching (PCC) ditu, kemari.

Tandu iya, jurai nya udah ngasuh orang salah runding laban perintah kelebih agi Opis Menteri Perengka Pengangkut nadai kala berandau tauka merambu deka ngenaka lisin ngagai penguna basikal.

“Aku ngarapka pekara tu nyemetak didinga ngagai penguna basikal.

“Sarawak ngembuan mayuh peminat ti rindu ngena basikal nya kebuah aku deka madahka pekara tu ngagai sida.

“Taja pia, kitai minta semua penguna basikal ba jalai alun nitihka undang-undang ti endang udah bisi,” ku iya.

Apin lama media rama begau lebuh sebuah media di menua tu madahka berita pasal orang ti mai basikal mesti direjister sereta ngembuan lisin.