KUCHING: Bantu Khas Indai Tunggal (BKIT) dikeandal ulih ngelempungka tating penusah ke ditapi raban indai di nengeri tu, ku Datuk Sri Fatimah Abdullah.

Menteri Pengintu Pengelantang Raban Bansa, Orang Indu, Ruang Bilik enggau Pemansang Anak Mit (KWKPK) nya madah komiti BKITl ulih neruska pengawa meri bantu tu pengudah Perintah Besai ngatur baru Atur Pengawa Standard (SOP).

“Bantu nya deka diberi enggau chara lansam (sekali bayar) ngagai indai tunggal ti nerima bantu nya.

“Penerang raban indai tunggal tu mega deka diuambi ari Opis Pengelantang Komuniti (JKM), Komiti Peranak

Pemansang Ruang Bilik Menua (LPPKN), Opis Pemansang Orang Indu (JPW) enggau Indai Tunggal ti ukai nerima bantu,” ku iya.

Fatimah munyi nya lebuh ngenataika licha Bantu Khas Indai Tunggal di Opis iya di Begunan Baitulmakmur, kemari.
Ku iya, indai tunggal ti ulih minta bantu tu mesti peranak Malaysia, penatai belanja baruh RM1,020 tauka perkapita RM255 (di Sarawak).

“Beri ngagai sida ti patut nerima bantu BKIT tu iya nya sida ti balu tauka janda, udah nikah tang laki sakit raya tauka nadai ngembuan surat tikah, indai tunggal ti bisi orang dipelanja.

“Kelimpah nya, sida indu ti empai nikah tang bisi anak dipelanja tauka anak iru, sida ti ditinggalka laki, indai tunggal ti bankrap tauka dijil enggau indai tunggal ti kena penusah ketegal Covid-19,” ku iya.