KUCHING: Rayat Sarawak nyengkaum sida ke bisi pas diau mendam (PR) Sarawak enggau Pas Visa Sarawak mesti minta pemendar enggau ngisi pom online nengah aplikasyen EnterSarawak sebedau tama kitu bepun 25 September tu.

Komiti Penyangga Penusah Ngenyit Nengeri (JPBN) Sarawak madah, sida deka diasuh kuarantin ba rumah pengelama 14 hari enggau diberi gelang jari.

“Sida deka beperesa rT-PCR ba hari kedua enggau hari ke-10 lalu ungkus nya deka dipelanja Perintah Sarawak,” ku penerang nya, ensana.

Nambahka nya, JPBN madah peranak Malaysia sekalika ari Semenanjung Malaysia, Sabah enggau Labuan sereta peranak menua luar ti deka tama kitu nengah Sabah enggau Labuan mesti minta pemendar tama ke Sarawak nengah chara ti sama.

Taja pia, sida mesti nyempulang pemutus swab test rT-PCR ti ulih dikena tiga hari sebedau dikemendar tama kitu.

“Sida mega deka diberi pas tama pengelama lima hari ba Sarawak enggau nyempulang tikit bilun pulai.

“Sida ti enda nyempulang pemutus rT-PCR Covid-19 dalam tiga hari sebedau tama kitu, enda dikemendar tama ke Sarawak,” terang JPBN.

Ba lansa sama, JPBN madahka semua peranak menua enggau menua luar ti suah berundang ari Sabah tauka Labuan nuju Sarawak nyengkaum servis bekaul mesti minta pas khas ari Komiti Penyangga Penusah Ngenyit Bagi Menua ba Opis Residen.

Ku penerang nya, sida deka beperesa Covid-19 ba hari ke-14.

Asil pemutus rT-PCR Covid-19 sida semina deka dikenuku pengelama 14 hari lalu enti sida enda beperesa, pas khas nya ulih dikena.

Semua peranak menua enggau menua luar ti tama kitu mesti ngenukuka diri enti sema sida udah diau ba Sabah tauka Labuan dalam timpuh 14 hari ke udah bepun 25 September tu.

Nambahka nya, JPBN nerang, enti sema sida ngenukuka penerang bula, sida deka diukum di baruh Ordinan Perlindungan Kesihatan Awam 1999.

Nangkan nya, semua peranak menua enggau menua luar ti tama kitu nengah pejalai transit ari Sabah enggau Labuan mesti minta pemendar tama ke Sarawak enggau ngisi pom online ba aplikasyen
EnterSarawak.

“Semua penerebai ti transit nengah Sabah tauka Labuan seagi nadai pansut ari padang bilun dikemendar tama ke Sarawak lalu enda ibuh nyempulang pemutus rT-PCR Covid-19.

JPBN nerang, sida seruran bejejaga pengudah mayuh kes positif Covid-19 diripotka ba Sabah.

Pia mega, kandang menua ba Sabah udah dirintai nyadi zon mirah laban ngerikod lebih 41 kes.