KUCHING: Perintah Sarawak tetap ngetanka industri lada ba menua tu setipak enggau rega komoditi nya ke kala niki ba makit Malaysia.

Sapit Kepala Menteri Datuk Amar Douglas Uggah madah, taja rega lada enda tetap ninting taun tang lada nya besai guna kelebih agi ungkup peranak menua pesisir.

“Ari taun 1998 nyentuk lima taun ke udah, rega lada kala manggai RM50,000 setan.

“Taja rega lada udah nurun nyau deka 50 ngagai 60 peratus diatu tang kitai tetap naka ulih ngulihka subsidi nentuka industri nya enda labuh,” ku iya.

Uggah mansutka jaku nya ngagai pemberita Suara sarawak ba opis iya di begunan Wisma Bapa Malaysia, ditu ensana.

Ku iya, semua piak ngesan tanggungpengawa nentuka industri lada mengkang tegap.

Kebuah pia laban pengawa nanam nya majak kurang ketegal pedagang ti nadai mereti nyampur lada import ari Vietnam enggau Indonesia nyadi lada Sarawak.

“Pekara baka tu meri pemar ba pemansut lada Sarawak laban nya udah ngeruga kualiti lada kitai ke diatu.

“Nya kebuah, aku minta kaunsil pekara makit lada ulih neritka agi atur nentuka kualiti lada Sarawak tetap dijamin,” ku iya nyemetak madah.

Ku Uggah, iya meransang Gerempung Orang Bumai Pelilih Menua baka ba Betong ngambi nyukung industri tu nyendiaka mesin enggau kereban diguna dikena nangkup peminta makit entarabansa.