KUCHING: Projek jalai raya tebing pantai Utara nyadi pengenap Jalai Besai Pan Borneo dalam ngangkatka pengalantang enggau pemisi Jalai Raya Sarawak, ku Datuk Amar Awang Tengah Ali Hasan.

Sapit Kepala Menteri nya madah jalai raya tebing pantai Utara tu sebagi ari Jalai Besai Pan Borneo ti dikinsil Perintah Pakatan Harapan (PH) menya tang ditampung Perintah Sarawak baru nengah Ejensi Pemansang Wilayah Utara (NRDA) ke dipegai RECODA.

“Jalai raya tu beguna amat dikena nyendiaka rentayan jalai ti lebih menyana ba pelilih Utara Sarawak laban berimbai enggau menua Brunei, Sabah enggau Indonesia.

“Nengah jalai alun tu, dagang enggau pengawa beranakka puku serantau BIMP-EAGA deka meransang ekonomi menua nambah kelimpah meri penguntung ngagai rayat,” ku iya.

Iya bejaku munyi nya ba pengawa Nutup Makmal Penilaian Jalai Raya Tebing Pantai Utara di Palan Aum Penview Kuching (PCC) ditu, kemari.

Awang Tengah ti mega Menteri Dagang Entarabansa enggau Industri, Terminal enggau Pemansang Orang Dagang madahka, pemindah indu menua Indonesia ari Jakarta ngagai Kalimantan deka meri pangka besai ngagai dagang merakak garis entara ti ngaul Sarawak.

“Iya ulih ngerapitka rentayan pemansang baru baka industri minyak enggau gis ba pesisir pantai di Limbang ti diatu agi dalam pansik enggau perambu kilang minyak di Lawas.

“Perintah Sarawak mega bisi merambu ngerembaika industri minyak enggau gis ngagai industri barang mata kelebih agi ba bidang petrokimia enggau napis patroleum enggau gis di Lawas,” ku iya.

Tandu Awang Tengah, pekara nya deka narit mayuh agi orang dagang ari menua bukai sereta meri pangka sosio-ekonomi ti manah ngagai Sarawak nyengkaum kandang menua utara.

Iya mega nambah, projek nya deka nambahka peluang pengawa puang ngagai rayat sereta narit mayuh agi industri bukai.

Berebak enggau nya, Awang Tengah madahka projek ngagai jalai alun nya dipelaba tembu dalam timpuh 48 bulan lalu dikemujur Maltimur Resources Sdn Bhd (MRSB) ti dichiri nyadi Konsultan Pengurusan Projek (PMC).

Kenu ku iya, Perintah Sarawak ngagihka RM1.5 billion ngagai NRDA dikena bejalaika 165 projek nyengkaum palan penerebai bilun ti baru ba Lawas.

“Enggau jalai alun pesisir Utara sereta perengka pengangkut ari atas tu, industri betanam betupi enggau dagang temuai menua pesisir di Sarawak deka ngerembai.

“Ambika chunto menua Limbang ti nyadi palan dagang temuai ti pemadu dikerindu rayat Brunei laban ngembuan pegung lutak gunung berapi,” ku iya.