KUCHING: Juluk besai perintah nengeri ba taun 2025 iya nya deka meda pengerekai igi penyakit rabies punas di menua tu, ku Dr. Nicholas Jenik.

Pemesai Opis Servis Veterinar Sarawak nya madah, program Vaksin Anti-Rabies sigi terus dipejalai ba hari bukai awakka ulih nyapai juluk perintah ti deka ngemunaska pengerekai igi penyakit rabies tu.

“Nya alai program tu diatur, awakka meri awak ngagai mensia mayuh ti deka ngulihka servis vakisn tu enggau pechuma.

“Kitai nemu mensia mayuh udah sedar enggau pengerekai penyakit tu, tang mayuh enda irau enggau penyakit rabies tu ti ulih ngerekai ba jelu tupi sida,” ku iya.

Nicholas madah munyi nya lebuh dirandau raban pemberita ba aum Program Vaksin Anti-Rabies di Balai Mensia Mayuh Majlis Bandaraya Kuching Selatan (MBKS), tadi.

Nangkannya, rambai jaku dikena ba aum program tu iya ‘End Rabies, Collaborate and Vaccinate’.