KUCHING: Pelilih Menua Lawas ngerikodka siti kes baru positif Covid-19 ti ngujungka penyampau kes positif di menua tu nambah 704 kes.

Komiti Penyangga Penusah Ngenyit Nengeri (JPBN) dalam penerang media seharitu madahka kes ke-704 tu siku orang ti gawa ba Opis Pengerai Nengeri Sarawak.

Kes diperesa Covid-19 sebedau nyereta Tim Bantu Opis Pengerai Mensia Mayuh ke Sabah ti deka mantu mutarka pengerekai kluster Covid-19 din.

Iya diperesa ba sebuah Klinik Pengerai Perintah kena 20 September lalu peresa rT-PCR kena 25 September ti nunjukka iya positif Covid-19.
Kenu ku JPBN, kes kala rengga enggau batuk kena 1 enggau 2 September nyin kemari.

Kes udah dianjung ngagai Sepital Miri ungkup pansik bukai lalu asil pansik tumu madahka kes nadai bisi ngembuan sejarah bejalai ngagai menua luar tang kala nemuai ke Kota Kinabalu, Sabah kena 26 Julai apin lama.

Pengawa ngiga orang ti bekaul rapat enggau kes benung dipejalai nyengkaum bala ruang bilik, bakih sama gawa enggau orang bukai ti bisi kaul enggau iya.

Berindik ari nya, Pelilih Menua Lawas diatu mali ari status gadung ngagai status kuning.

Pelilih Menua Kuching agi mengkang ba status kuning laban bisi siti kes baru diripotka dalam kandang 14 hari ti udah lalu.

Kelimpah ari nya, Kluster Alam di Bintulu diripotka udah punas kemari pengudah 28 hari nadai ngerikodka kes baru.

Kluster tu bepun nyadi ari sebuah kapal ti ngangkut ai gis tulin (LNG) ti belabuh ba palan penyangkai kapal Bintulu.

Kluster Alam bepun ditemu kena 20 Ogos lebuh empat iku anak kapal nya ditemu bisi dirampit Covid-19.

Nya lalu ngujungka enam iku agi bala sida ditemu positif Covid-19 kena 21 Ogos enggau 29 Ogos.

Sida ti ditemu positif ari Kluster Alam tu nyengkaum tiga iku rayat menua tu empu, tiga iku rayat menua Filipina enggau siku rayat menua India.