KUCHING: Penyampau bala temuai datai ke Sarawak kenyau Januari nyentuk Ogos taun tu kusut 62 peratus enti dibanding enggau taun 2019 ba timpuh ti sebaka.

Menteri Dagang Temuai, Seni, Main Asal Datuk Abdul Karim Rahman Hamzah madahka penyampau bala temuai tu nurun endang ketegal pangka pengerekai igi penyakit Covid-19 di selampur dunya.

“Ari Januari ngagai Ogos 2020 penyampau bala temuai kitu bisi 1,078,117 iku. Ba taun 2019 ba timpuh ti sebaka penyampau bala temuai kitu mayuh agi iya nya 2,915,819 iku,” ku iya.

Iya bejaku munyi nya ba aum pemberita pengudah pengawa namaka Kelidieng ngagai Muzium Budaya Borneo ditu, tadi.

Tandu Karim, dalam bulan Ogos taun tu aja, bala temuai ti nemuai ngagai Sarawak semina 44,156 iku enti dibanding enggau bulan Ogos 2019 penyampau temuai manggai 338,130 iku.

“Bulan Julai enggau Ogos endang mayuh temuai nemuai kitu laban mayuh pengerami diatur kitai maya nya tang penyampau temuai taun tu nurun 86.94 peratus enti dibanding enggau taun siti nyin kemari.

“Taja pia, pekara tu enda balat ngenusahka ati kitai laban selampur dunya napi pengerekai igi penyakit Covid-19, sigi penyampau orang nemuai maya tu mimit.

“Nya alai, kitai nyikap diri ba taun 2021 laban mayuh palan ngelantang ati tembu digaga ba Sarawak baka Muzium Budaya Borneo, Rumah Teh English, palan main asal enggau ke bukai,” ku iya.

Kelimpah ari nya, Karim meransang peranak menua Sarawak empu ngambi peluang nemuai dalam menua diri nengah Program Sia Sitok ti disediaka perintah.

“Peranak menua patut ngambi peluang tu laban rega ti murah kelimpah belajar pasal adat asal, main asal enggau produk ti bisi ba Sarawak,” ku iya.