SIBU: Bala ex-soldadu tau bendar bekunsika cherita sida maya gawa ngetan menua jeman menua tu agi sigau kelia ngambika ditemu mensia mayuh lebih agi rebak baru.

Kaban Kunsil Nengeri (Adun) Tamin Ir Christopher Gira Sambang madah, cherita nya manah dirikodka tauka ditulis dalam bup baka enggi Leftenan Kolonel (B) Linus Lunsong Janti.

“Leftenan Kolonel (B) Linus udah nulis semilan iti bup lalu kitai ngarapka bala ex-soldadu ke bukai tau nunda singkang iya nusika pengawa berambunka nyawa ngelaban penyelawai komunis menya.

“Kebuah pia, ngambika semua kitai baka rebak baru nemu baka ni bala bujang berani kitai kelia ngetanka pengelikun menua tu,” pia ku iya madah ngagai pengarang berita, kemari.

Kilah ensana, Ir Christopher Gira udah dipebasa bejadika bup dikarang Linus empu diberi nama ‘My Life With 3RD Ranger’.

PATUT DIKEMBUAN… Bup ‘My Life With 3RD Ranger’ dikarang Lt. Kol (B) Linus Lunsong Janti.

Sama bela datai meri sukung maya pengerami tu iya nya Pemesai Khas ba Opis Kepala Menteri Leftenan Jeneral (B) Datuk Stephen Mundaw.

Nambahka jaku iya, Ir Christopher Gira madahka diri nyukung amat pengawa Linus nya.

Ku iya, enti enda digagaka bup tauka dokumentari baka nya, mayuh orang enda nemu baka ni pengeransing bala bujang berani baka Linus berambunka nyawa nyaga pengelikun menua tu menya.

“Bup tu bekunsika cherita Linus maya nyadi raban pengetan pengelikun maya taun 70-an ngagai 90-an menya.

“Nya alai, kitai ngarap bala bujang berani bukai bela nyimpan lalu bekunsika cherita sida suba nengah bup baka tu,” ku iya madah baru.

‘My Life With 3RD Ranger’ nibak sekeda ari cherita Linus iya nya siku ari raban soldadu Malaysia betempuh ngelaban penyelawai jeman Konfrantasi Malaysia-Indonesia ba taun 1960 suba.

Maya tu iya begulai ba 3rd Batallion Malaysia Rangers alai iya enggau bala platun iya dipinta ngiga komunis di Sarawak enggau di Perak.

Bup tu ditengkebang iya ngena dua iti jaku iya nya Jaku Iban enggau Jaku English.

Sekeda bup bukai kala ditulis Linus iya nya baka ‘The Murder Of Penghulu Imban’, ‘Sigai Bujang Berani’, ‘The Little Iban Warrior’, ‘The Little Iban In RASCOM’, ‘The Little Iban At The Mountain’ enggau ‘Nyayang Bujang Berani’.