BETONG: Beri aku awak tiga bulan, pia ku Kepala Menteri Datuk Patinggi Abang Johari Tun Openg bekaul enggau perambu Perintah Sarawak nguasa kebun Tabung Haji ke benung dalam proses diperunding.

Kenu ku iya, perintah GPS benung berunding enggau Tabung Haji awakka ulih nguasa kebun kelapa sawit ke diatu agi dikuasa Tabung Haji.

“Insya-Allah enda lama agi, iya deka diempu Perintah Kerajaan Sarawak lalu nya tentu deka mantu pekebun mit ba sitak nya baka ba Zon Betong enggau Simunjan.

“Beri aku awak tiga bulan tu ngatur pekara tu enggau piak Tabung Haji…laban proses ke udah dipejalai manggai 50 peratus lalu semina nganti nyain sempekat,” ku iya.

Tuai Dipebasa PBB PBB nya madah munyi nya lebuh bejadika Konvensyen Khas PBB Zon Betong ditu kemari.

Berebak enggau nya, Perintah Sarawak ku iya mega deka muka tanah nengah Taman Betanam Betupi ba sitak tu.

“Tu betuju ngemansangka kandang menua pesisir. Tanah kitai bisi, penanggul iya kitai enda ngemansangka nya.

“Nya alai, rayat ke bisi tanah lebih agi tanah NCR, anang sesekali nyual,” ku iya.

Tandu iya, pemansang Taman Betanam Betupi enggau serikat besai ulih nentuka asil dijual ngagai menua luar.

“Lebuh aku nyebut semua tu, aku deka ngereja iya baka negika hak minyak enggau gis lalu kitai diatu udah mujur bulih asil ari atur neritka Chukai Bejual Sarawak,” ku iya.

Ngelansa pasal isu ubah Kanun Tanah Sarawak, Abang Johari nyemetak madah iya dikena nentuka rayat ngembuan keresa (tanah).

“Ubah Seksyen 6A iya bya ngaku pulau galau enggau pemakai menua nyadi sebagi ari tanah NCR ke diempu penuh.

“Kitai deka meda komuniti bulih tanah ba Seksyen 6 lalu udah nya diberi Seksyen 18 ungkup tanah kediri.

“Tu betuju awakka sida bisi keresa tanah. Kitai lurus ati meri tanah nya ngagai orang Dayak, orang Melayu, Melanau ke mega bisi tanah adat. Nya alai, semua disengkaum nengah siti undang-undang lalu tu patut ditemu semua piak,” ku iya.

Iya enda ngenggaika sentimen deka diangkai semak PRN-12, taja pia bisi undang-undang ti negika hak rayat ba tanah nya.