KUCHING: Pengawa namaka lungun bansa Melanau ke dikumbai Kelidieng ngagai Muzium Budaya Borneo (Muzium Baru) mujur sereta diintu enggau penuh basa kemari.

Menteri Dagang Temuai, Seni, Main Asal Datuk Abdul Karim Rahman Hamzah madahka Kelidieng nya kebendar datai ari Kampung Ud, Dalat kenyau taun 1962 menya lalu diayanka ba Muzium Lama.

“Umur Kelidieng tu manggai 200 taun laban iya digaga ba kurun ke-19 masihi. Iya digaga ari kayu tebelian lalu diukir nitihka motif bansa Melanau,” ku iya.

Karim bejaku munyi nya ba aum pemberita pengudah pengawa namaka Kelidieng ngagai Muzium Budaya Borneo ditu, kemari.

Kenu ku iya, sebedau diengkah ba dalam Muzium Baru, Kelidieng tu mesti diberesi dulu nitih adat bansa Melanau empu.

DIJAGA MANAH…Kelidieng tu kebendar datai ari Kampung Ud, Dalat digaga taun 1962 menya lalu kala diayanka ba Muzium Lama.

“Lebuh kitai tama ba mua pintu muzium ila kitai deka meda Kelidieng bediri tetegir,” ku iya.

Berebak enggau nya, Karim madahka Kelidieng entara siti ari keresa lama bansa di Sarawak ti deka dibai tama ngagai muzium baru.

“Kitai bisi siti agi lungun ti deka dibai tama kitu iya nya lungun bansa Punan, Orang Ulu.

“Lungun nya deka dibai tama kitu ari Muzium Lama lalu deka diintu nitih chara bansa Punan empu.

“Kelimpah ari nya, kitai mega deka namaka keresa lama bansa Iban iya nya Perau Bujang Berani ti deka dipiringka dulu lalu diintu nitihka chara bansa Iban empu,” ku iya.

Karim ngarapka pengudah semua keresa lama tu dibai tama sida deka ngatur pengawa bejadika Muzium Budaya Borneo dalam bulan April taun baru (2021).

“Kebendar iya, kitai merambu bejadika muzium tu bulan Disember tu ila, tang ketegal penanggul pangka Covid-19 nyadi, nya ti ngasuh kitai ngelanjarka pengawa bejadika muzium tu ngagai bulan April taun baru.

“Diatu, pengawa nusun keresa lama bejalai enggau manah lalu aku andalka bala temuai deka rindu datai ngelawa muzium baru tu ila,” ku iya.