BETONG: Pemutus numbuhka Kaunsil tauka Ejensi Tebing Pantai dikena ngerembaika penau pengeraja ke bisi ba sitak kandang pesisir ulih nempa iya nyadi berega dudi hari.

Menteri Muda Infrastruktur enggau Pemansang Pengkalan Kapal Datuk Julaihi Narawi madah, penumbuh nya udah suah dikenataika pengari rayat ba sitak nya dalam Aum Kunsil Nengeri ke udah.

Kenu ku iya, peminta numbuhka kaunsil nya endang beguna lalu disukung penuh semua 14 pampang deligit ke asal ari sitak nya.

“Kitai meda ba menua luar, sitak ba tisi pantai endang keresa ke berega, tang pekara ke bebida nyadi ba sitak tebing pantai ditu.

“Tu beduduk ari menua lur bisi Kaunsil tauka Ejensi Pengatur Zon (Coastal management Zone) lalu sitak menua tebing pantai diperati ari sukut jalai besai udah bisi, penanggul tanah tusur, enggau baka ni ngatur pengeraja bukai ke bisi.

“Ambika banding asil berikan, nyadi baka kitai deka ngelakuka produk ari pengawa berikan keliampah ari produk betanam betupi,” ku iya maya dirandau Suara Sarawak ba Opis Residen kemari.

Berebak enggau nya iya madah sitak tebing pantai ari selatan nyentuk ke utara Sarawak kaya enggau pengeraja asal nyengkaum ari asil berikan, asil tanah, sektor ekodagang temuai ke bedau diadu manah agi.

Ku iya, atur merati enggau silik sukut nya nengah penumbuh patut digaga bekau ari pengawa ngaga jematan enggau jalai besai ba sitak nya ke benung dipejalai.

Ngelansa pekara bukai Kaban Kunsil Nengeri Sebuyau nya mega madah jalai nuju Jematan Batang Lupar urung 5.1 km pemanjai entara
Sebuyau enggau Triso diatu benung digaga.

Sebedau nya, Julaihi madag projek nya diatu digaga penuh Perintah Sarawak pengudah Perintah Besai nginsil pekara ke udah dikeaum pasal mayar 50 peratus ari belanja ngaga jematan nya, taun tu.