BETONG: Selampur menua ba Zon Betong dipelaba bulih 100 peratus bungkur bekal kuasa karan taun baru (2021).

Menteri Utiliti Datuk Seri Dr. Stephen Rundi Utom madah, diatu bungkur karan manggai 95.3 peratus lalu 198 ruang bilik disambung enggau RES Last Mile sereta 136 ruang bilik disambung enggau Sares.

“Nya alai enti 1,475 ruang bilik ke agi nadai karan disambung enggau RES Last Mile nyadi tah baru sida tu di Betong bulih japai 100 peratus disambung karan,” ku iya.

Iya ke mega Mandal Chairman PBB madah munyi nya ba atur bekunsi penemu beserimbai enggau Konvensyen Khas PBB Zon Betong di Dewan Sukan Tan Sri Datuk Amar Stephen Kalong Ningkan, kemari.

Ku iya, selampur Sarawak nerima japai kuasa karan urung 97 peratus lalu ba sitak menua pesisir manggai 93 peratus.

Nangkan nya, ku iya Perintah Sarawak nengah sekeda strategi (program) baka Projek Rakyat ke mungkur RES, Sares, ngaga sabstesyen enggau ALAF.

Ngelansa pasal ALAF di Zon Betong, 52 projek udah tembu, lapan benung dipejalai enggau 120 projek agi nganti.