SIBU: Unit Pekara Pengarap Bukai (Unifor) neruskan pengawa nyaup meri agih belanja ngagai gerija di nengeri tu.

Serak tu Gerija Borneo Evangelical Mission (BEM) Rumah Gelayan, Tubau udah nerima bantu RM100,000 enggau Gerija BEM Kelompok Kampung Senep di Tubau, Murum mega nerima RM80,000.

Bantu nya disuaka Kaban Kunsil Nengeri (Adun) Murum, Kennedy Chukpai Ugon, kilah ensana.

Kennedy ba jaku iya meri besai terima kasih ngagai Perintah Nengeri Sarawak ti betuaika Kepala Menteri Datuk Patinggi Abang Johari Tun Openg ti udah tampak bebendar nyaup pengarap bukai ari pekara belanja.

“Ngarapka bantu perintah nengah Unifor tu ulih dikena enggau manah nitihka tuju peminta enggau atur ari Unifor,” pia ku iya madah.

Sehari nya mega, Kennedy enggau bala bukai bela besembiang di Gerija BEM Kelompok Kampung Senep.

Sama bela datai Chairman enggau Sapit Chairman BEM Pelilih Bintulu Pastor Sem Rining enggau Pastor Joseph Raja sereta Pastor Luhat Laing.