SIBU: Parti Bansa Dayak Sarawak (PBDS) Baru netapka parti sida semina ungkup bansa Dayak aja lalu enda nerima orang bukai nyengulai sida.

Sekretari Besai PBDS Baru Julius Enchana madah, pekara tu endang udah ditetapka kenyau ari parti sida ditumbuh ba taun 2013 suba.

“Nya alai, pengering parti tu ukai ba bansa bukai tang bepanggai ba bansa Dayak empu,” pia ku iya madah ngagai pengarang berita, kemari.

Nambahka jaku iya, parti sida semampai enda kala leju bejaku negika hak bansa Dayak lebih agi ba Menua Sarawak enggau Federal Constitution.

“Interpretation Ordinance 2004 meri empas ngagai status bansa Dayak ke alai ubah tu enda nyerangkum Iban enggau Bidayuh ba Federal Constitution.

“Pengari rakyat bansa Dayak dipeda enda tesebut ke pekara tu ba aum Kunsil Nengeri, nya alai, kitai udah milih sida nyadi pengari, tu tanggungpengawa sida bejakuka hak kitai,” ku iya madah baru.

Berindik ari nya, Julius minta bansa Dayak sama besaup ngering ka parti tu.

“Sapa-sapa kitai bansa Dayak ti sepenemu sereta sebaka ati baka kami, kita tau ngiga aku minta nyadi raban parti.

“Pia mega ngagai kita ti bisi ati deka nyaup bantu wang ringgit kita tau ngiga Tukang Wang PBDS Baru, Sai Malaka tauka ngenataika bantu nuju akaun parti CIMB Bank (8603732496),” pia ku iya.

Ba senentang pengawa bepilih nengeri ti deka datai ba penuduk DUN Dudong, Julius madah, pekara tu manah ngelakka Kunsil Besai parti nentuka iya.

“Nyema PBDS Baru nadai nganjung chalun ba Dudong, kami mega tetap bejaku ke pekara ti patut lalu nyadi ‘check and balance’ DUN tu ila,” ku iya madah.